工地大排查行動
有Follow開我地勞工事務局資訊嘅市民，都會知道我地一直高度重視各行業嘅職安健狀況！近日，為咗有效針對全澳建築工地同工程地點嘅職安健，由6月份開始，再次展開咗工地嘅排查行動！目的都係希望藉此警惕社會各界關注，並貫徹執行職安健嘅相關措施，避免意外發生。
講得高度重視，展現嘅方式當然唔係齋talk！如果排查行動中發現工地存有職安健問題，勞工局會採取“即罰、即停、即教育”嘅執法措施，即時勒令職安健表現不及格嘅工地停止相關危險工作、同埋即時教返相關人員點去修正、改善工地嘅安全問題！
工作安全～真係好！重！要！所以對於有問題嘅工地，勞工局除咗依法提起處罰程序外，我地仲會要求有關人員即時開展檢討會議，加強工友嘅安全培訓，強調相關職安健預防措施，確保有關場地嘅不安全狀況完全改善並符合要求後，先可恢復有關工作。
最後，勞工局呼籲各工地人員重視職安健，並繼續配合政府推動各項職安健嘅工作！
返回
掃碼
