| (圖文包) 職業技能競賽 - 加油啊，澳門人! | |
|---|---|
|
日期：2018-09-19
分類：
圖文包,
僱員,
僱主,
職業培訓及技能鑒定,
大灣區,
粵港澳大灣區職業技能大賽,
|
日前， 由澳門建造業總工會組織嘅代表隊成員鄭家樂、李清、許錫雄參加 “粵港澳大灣區首屆焊接職業技能大賽”，喺9市2區共11隊約30名嘅參賽者中，獲取左城市組別銅獎，三位選手亦獲得單人季軍嘅成績。呢D都係佢地辛苦努力進行密集式嘅訓練成果，同為澳門人嘅小編真係為佢地感到驕傲。
其實澳門選手一直出戰職業技能界別嘅比賽嘅成績都不錯，以往幾屆都喺有「技能奧林匹克」之稱嘅《世界職業技能競賽》中屢獲佳績，而去年喺阿聯酋阿布扎比舉行嘅《第44屆世界職業技能競賽》，澳門選手馮學健更加喺網站設計項目中，獲得金牌添。
勞工局一直都致力喺持續推動職業技能提升，鼓勵澳門年青人努力培養自身嘅職業技能，拓闊國際視野，就好似「2018年 (第十屆)穗港澳蓉青年技能競賽」將會喺今年10月30及31日舉行，有關競賽係兩年一度嘅職業技術教育及培訓界盛事，由廣州、香港、澳門及成都四地輪流主辦，而今年將會喺澳門舉行，透過大規模區域性嘅職業技能交流活動，構建一個平台，為四地相關行業嘅青年、評判、專家及培訓機構提供寶貴嘅交流機會。
除左「穗港澳蓉青年技能競賽」之外，之前提過嘅《世界職業技能競賽》將喺2019年俄羅斯喀山舉行啦，其實有關賽事是每兩年於世界不同地方舉行一次，每屆賽事都吸引上千參賽者參加，勞工局會帶領澳門選手參與有關競賽。參與賽事對澳門嘅職訓發展、行業發展、甚至係對青年嘅成長等都有著重要意義。而勞工局依家正籌備選拔同培訓等工作，希望可以帶領澳門選手再創佳績啦。
除左上面面向國際嘅賽事之外，澳門本地嘅賽事勞工局亦同樣重視，而依家勞工局及澳門工會聯合總會亦都正為本地企業員工籌辦緊「第一屆澳門綜合旅遊休閒企業職業技能競賽」，有關比賽將會喺2018年12月至2019年1月舉行，並將分設“酒店綜合服務職業技能大賽”、“博彩娛樂職業技能大賽”、“世界美食之都職業技能大賽”，可以俾企業展現對員工職業培訓及技能提升嘅重視，亦可以俾員工充分展示佢地嘅技能水平同埋培訓成果添。
所以小編話只要肯努力，一定有為澳爭光嘅機會。加油啊，澳門人。
返回
