有FOLLOW我哋PAGE嘅朋友仔，应该知道我哋之前去咗工联职中同培道中学进行「职安新力军Workshop」嘅活动。正所谓「预防胜於治疗」，提早向年青人灌输职安健知识，目的都系希望为「工作零意外」打好基础。对於今次嘅推广职安健任务，除咗多谢各位同学仔全程投入外，亦非常感谢校方嘅支持！依架一齐睇下校方对上述活动嘅睇法啦～～
小编：请问 贵校点解有兴趣参加「职安新力军Workshop」活动呢？
吕校长（工联职中）：工联职中由高中开始已经设有以职业为导向嘅课程，目的系令同学投身社会前已能学到一技之长；任何工种都需要重视职安健，所以要喺同学正式投入工作前，加强呢方面嘅意识。
郑副主任（培道中学）：主要考虑到健康安全嘅意识对於同学日后嘅工作发展及家庭幸福都好重要，所以觉得可以由中学开展宣传工作。另外，可以将职安健嘅讯息融入学生嘅日常生活当中，令其养成习惯。
本局人员与吕校长合影──工联职中
小编：透过本次活动，师生们对职安健嘅得着有边Ｄ呢？
吕校长（工联职中）：除左同学仔，亦令老师们都一并强化咗相关嘅认知，班主任亦提议可多做呢类型嘅活动。
郑副主任（培道中学）：校方认为「职安新力军」系一个好活动，因为各行各业都有可能发生工作意外，包括教师。可以喺教育学生嘅过程中，亦令教师们都明白当中嘅重要性。透过呢次活动，学校都会考虑喺公民课或早会等课程中，渗透一d职安健嘅常识，例如可以同d同学分享下相关嘅新闻资讯等。
本局人员与石主任（右二）和郑副主任（左二）合影──培道中学
小编：对培养学生未来投身工作时，喺工作安全意识方面， 贵校认为我哋活动有咩内容可以改进同加强嘅地方呢？
吕校长（工联职中）：局方可以考虑再同学校合作，善用周会时段推广职安健，因为周会系全校一齐，所以可以令活动覆盖率更全面。欢迎局方喺新学年再同校方联络安排。
郑副主任（培道中学）：由於现时社会趋向资讯型，在工作、教学或学习当中会使用更多智能产品，局方可以加强有关正确使用电脑或智能产品须注意嘅职安健知识，例如：用家同电脑萤幕嘅适当距离、高度，或者长时间使用时嘅正确姿势等；日后局方如再举办「职安新力军」活动，可以安排由局方人员带领师生一齐做伸展操，令参与者认识如何做到腰背保健运动。
最后，小编再次感谢校方对本局推行职安健教育所给予嘅大力支持！如果大家都想知多Ｄ职安健嘅资讯，可以浏览劳工局网站入面嘅「职安健天地」了解多D架！
返回
扫码
