| (图文包) 职业技能竞赛 - 加油啊，澳门人! | |
|---|---|
|
日期：2018-09-19
分类：
图文包,
雇员,
雇主,
职业培训及技能鉴定,
大湾区,
粤港澳大湾区职业技能大赛,
|
日前， 由澳门建造业总工会组织嘅代表队成员郑家乐、李清、许锡雄参加 “粤港澳大湾区首届焊接职业技能大赛”，喺9市2区共11队约30名嘅参赛者中，获取左城市组别铜奖，三位选手亦获得单人季军嘅成绩。呢D都系佢地辛苦努力进行密集式嘅训练成果，同为澳门人嘅小编真系为佢地感到骄傲。
其实澳门选手一直出战职业技能界别嘅比赛嘅成绩都不错，以往几届都喺有「技能奥林匹克」之称嘅《世界职业技能竞赛》中屡获佳绩，而去年喺阿联酋阿布扎比举行嘅《第44届世界职业技能竞赛》，澳门选手冯学健更加喺网站设计项目中，获得金牌添。
劳工局一直都致力喺持续推动职业技能提升，鼓励澳门年青人努力培养自身嘅职业技能，拓阔国际视野，就好似「2018年 (第十届)穗港澳蓉青年技能竞赛」将会喺今年10月30及31日举行，有关竞赛系两年一度嘅职业技术教育及培训界盛事，由广州、香港、澳门及成都四地轮流主办，而今年将会喺澳门举行，透过大规模区域性嘅职业技能交流活动，构建一个平台，为四地相关行业嘅青年、评判、专家及培训机构提供宝贵嘅交流机会。
除左「穗港澳蓉青年技能竞赛」之外，之前提过嘅《世界职业技能竞赛》将喺2019年俄罗斯喀山举行啦，其实有关赛事是每两年於世界不同地方举行一次，每届赛事都吸引上千参赛者参加，劳工局会带领澳门选手参与有关竞赛。参与赛事对澳门嘅职训发展、行业发展、甚至系对青年嘅成长等都有着重要意义。而劳工局依家正筹备选拔同培训等工作，希望可以带领澳门选手再创佳绩啦。
除左上面面向国际嘅赛事之外，澳门本地嘅赛事劳工局亦同样重视，而依家劳工局及澳门工会联合总会亦都正为本地企业员工筹办紧「第一届澳门综合旅游休閒企业职业技能竞赛」，有关比赛将会喺2018年12月至2019年1月举行，并将分设“酒店综合服务职业技能大赛”、“博彩娱乐职业技能大赛”、“世界美食之都职业技能大赛”，可以俾企业展现对员工职业培训及技能提升嘅重视，亦可以俾员工充分展示佢地嘅技能水平同埋培训成果添。
所以小编话只要肯努力，一定有为澳争光嘅机会。加油啊，澳门人。
返回
