| (圖文包) 關懷無障礙，共融建未來！ | |
|---|---|
|
日期：2019-08-06
分類：
圖文包,
僱員,
僱主,
就業及招聘,
其他,
|
小編知道，其實喺社會上有唔少嘅人一直以嚟都默默咁為有需要幫助嘅人士出力。就好似喺今個暑假，勞工事務局、本澳多間企業同學校又再合辦咗一個好有意義嘅活動～就係「工作體驗活動」，呢個活動係專為特殊教育及融合教育嘅應屆畢業生同高二嘅同學仔而設，活動會喺暑假安排佢哋到企業進行為期三個星期嘅實習，等佢哋喺進入社會工作之前，可以先體驗一吓工作嘅實際情況，同時企業嘅人員又可以透過實習認識同了解同學仔嘅工作能力，真係一舉兩得架！
7間企業代表主持「2019工作體驗活動」啓動儀式
仲有呀！為咗使同學仔能更好掌握面試技巧同認識工作安全，喺實習之前，勞工事務局仲會為佢哋安排「模擬面試」同埋「職業安全健康講座」，等佢哋順利通過面試並獲得實習嘅機會，學習咗工作安全規則，咁做起嘢上嚟，就更加得心應手、萬無一失啦！
話時話，呢個活動今年已經係第7年舉辦架啦，無論係參與嘅企業同學校，抑或係參與人數同實習部門，都一年比一年多，今年就有7間企業及9間學校參與，參加實習嘅同學仔亦有44名，而實習部門就增加到13個，例如有制服部、員工餐廳、餅房、管事部、倉務部、餐飲部、布草房、花房同環境衛生部等。
計起上嚟，呢6年已經有49名同學仔實習後進入實習企業或其他企業工作，而且僱主對佢哋嘅工作表現普遍都係稱讚有加。就喺7月初，勞工局舉行咗活動嘅啟動禮，邀請參與嘅企業、學校代表，同埋同學仔分享佢哋嘅感受，場面真係好「滾動」呀！ 等我哋一齊聽吓佢哋「感言」啦！
小編一直都認為，社會上每一個人都應該享有平等嘅權利同機會，即使係一啲有特殊教育需要嘅青少年，只要能夠得到平等嘅機會、適當的協助及培訓，一樣可以發展佢哋嘅潛能，開創自己嘅豐盛人生。
返回
